Нацыянальны парк “Браслаўскія азёры” пачаў уладкаванне рэкрэацыйнай зоны па берагах азёр Струста і Снуды. Гэтыя два вадаёмы – перліны сістэмы Браслаўскіх азёр – найбольш папулярныя сярод аматараў адпачынку на прыродзе. Пяць стаянак, што размяшчаюцца паблізу гары Маяк, ніколі не пустуюць. Пад кронамі соснаў ці сярод ядленца, які вышынёй і стромкасцю нагадвае паўднёвыя кіпарысы, у непасрэднай блізкасці ад вады турысты з задавальненнем праводзяць свой адпачынак.
Таму, кажа начальнік аддзела турызму нацпарку Юлія Паўлоўская, і было прынята рашэнне палепшыць тут умовы для прыёму людзей. На паўвостраве Перавалока ідзе абсталяванне яшчэ пяці турыстычных стаянак. А каб наведвальнікі маглі лёгка дабрацца да іх, да лета будзе пабудавана і дарога.
