Новую лінію па разліве тэхнічнай вадкасці на Багушэўскім спіртзаводзе ААТ “Віцебскі лікёра-гарэлачны завод “Прыдзвінне” зманціравалі яшчэ ў пачатку года і меркавалі наладзіць вытворчасць шклоамывальніка і дэнатурыраванага спірту. Аднак пакуль рыхтавалася неабходная дакументацыя для атрымання сертыфікату, сітуацыя змянілася, і калектыў на яе адрэагаваў.
– Тэхнолагамі галаўнога прадпрыемства была распрацавана рэцэптура дэзінфіцыруючага сродка, у паскораным рэжыме праведзена яго сертыфікацыя, інжынерная служба ўнесла некаторыя змены ў лінію разліву. Днямі яна пачала работу ў тэставым рэжыме, – адзначыў дырэктар Багушэўскага спіртзавода Віктар Грачыха.
Спецыялісты з Віцебска правялі пробны разліў, абучэнне рабочых, якія будуць працаваць у новым цэху. За першую змену ў шасцілітровыя ёмістасці было разліта амаль 5 т дэзсродку. Партыю адгрузілі РУП “Белфармацыя”. Вытворчыя магчымасці плануецца нарошчваць праз арганізацыю работы ў дзве-тры змены і павялічэнне колькасці апаратаў для разліву.
Аляксандр Лазюк, Сянно, фота БелТА.
