Уборку рапсу Пастаўскае аграпрамысловае аб'яднанне закончыла яшчэ на мінулым тыдні. З плошчы больш чым 2 тыс. га на круг узялі па 16 цэнтнераў.
– Хацелі б больш, – кажа дырэктар АПА Канстанцін Гайлеўскі, – але, калі параўнаць з мінулым годам, амаль двухразовы прырост таксама паказчык таго, што гаспадаркі вучацца працаваць з гэтай дарагой тэхнічнай культурай. Лепшы вынік атрымалі ў ААТ «Камайскі-Агра», дзе з гектара намалацілі па 20,7 ц і ў цэлым па сельгаспрадпрыемстве маюць 1670 т насення. Гаспадарка ўжо выканала дзяржзаказ па яго адгрузцы, разлічвае мець яшчэ ад продажу іншым спажыўцам да 2 млн руб. Гэта пры тым, што 160 га пасеваў выгарала ў чэрвені.
На рост ураджайнасці паўплывала тое, што з дапамогай мехатрада малаказавода гаспадаркі сталі лепш апрацоўваць глебу, праводзіць сяўбу, захавалі патрэбныя для культуры агратэхнічныя мерапрыемствы. Пасевы былі своечасова падкормлены мікра-элеменамі і азотнымі ўгнаеннямі, апрацаваны супраць пустазелля, шкоднікаў і хвароб. Таму і аказаліся больш устойлівымі да ўмоў надвор’я.
Не падвялі і камбайнеры. У «Камайскім-Агра», напрыклад, лідарамі ўборкі ў самым яе пачатку сталі Уладзімір Карыцька, Мікалай Махонь і Аляксей Яркоўскі, а таксама заводскі механізатар Васіль Чабуранаў (на фота).
З рапсавых палёў камбайны адразу пераехалі на збожжавыя. Сёлета практычна ўсе культуры саспелі адначасова. Па аграпрамысловым аб’яднанні належыць убраць больш за 8 тыс. га азімых і яравых збожжавых.
– Разгойдвацца некалі, – кажа дырэктар малаказавода. – Праўда, жніво пачыналі з горшых участкаў, зерне з якіх плюшчым на корм жывёле, пагалоўе якой павялічылася ў аб’яднанні за год на 1600 галоў. Таму не спыняем і нарыхтоўку кармоў, па 15 ц к. адз. травяністых кармоў на ўмоўную галаву ўжо маем. А да іх фураж, і зімоўка атрымаецца сытай. Дарэчы, у мінулым годзе ўпершыню за апошні час абышліся сваімі запасамі, не шукалі, дзе купіць сена ці сянаж. А сёлета павінна быць яшчэ лепш.
У аб’яднанні лічаць, што валавы намалот збажыны будуць мець больш высокі, чым летась. Разлічацца з дзяржавай, заказ якой пачалі ўжо выконваць, засыпяць насенны і страхавы фонды і будуць бачыць, як распарадзіцца астатнім з найбольшай карысцю для гаспадарак.
Фота Аляксандра АЗЕРСКАГА.
