Дзве пастаўскія гімназісткі Дар’я Шылей і Анастасія Фярковіч вырашылі напісаць пісьмо каралеве Вялікабрытаніі Елізавеце II.
Як сказала іх настаўніца англійскай мовы, каралева любіць пісьмы, напісаныя ўручную, з задавальненнем іх чытае, а канцылярыя абавязкова дае аўтарам адказ. Дзяўчынкі вырашылі праверыць, ці так гэта. Але перш, чым напісаць, пацікавіліся, як трэба звяртацца да манаршай асобы, вывучылі іншыя правілы этыкету. У пісьме расказалі пра сябе, пра сваю гімназію і горад, паклалі ў канверт паштоўку з выявай палаца Тызенгаўза.
Адказ прыйшоў у студзені. Памочніца Елізаветы ІІ з каралеўскай канцылярыі дзякавала дзяўчынкам за дасланы ліст, пісала, што вельмі цікава было даведацца пра іх горад, поспехі ў вывучэнні англійскай мовы. У канверт быў пакладзены фотаздымак каралевы з герцагам Філіпам, зроблены ў дзень 70-годдзя іх сумеснага жыцця, і буклеты пра жыццё яе вялікасці.
Такім чынам, першае ж практычнае выкарыстанне замежнай мовы гімназісткамі аказалася вельмі ўдалым.
