Міністр інфармацыі Рэспублікі Беларусь Аляксандр Карлюкевіч у межах адзінага дня інфармавання насельніцтва наведаў Полацк, дзе сустрэўся з калектывам паліграфічнага прадпрыемства «Спадчына Ф. Скарыны».
Першая частка сустрэчы была прысвечана тэме «Моладзь Беларусі: магчымасці для самарэалізацыі». Сёння ў рэспубліцы, як паведаміў кіраўнік міністэрства, 1 млн 921 тыс. маладых людзей ва ўзросце ад 14 да 31 года, што складае 20% насельніцтва. Сацыялагічныя даследаванні паказалі, што ў якасці асноўных арыенціраў наша моладзь выбірае стварэнне шчаслівай сям’і і захаванне здароўя (61%). У першую пяцёрку жыццёвых мэтаў уваходзяць нараджэнне і выхаванне дзяцей (48%), дасягненне дзелавога поспеху, кар’ера (38,5%), прафесійная самарэалізацыя (32,5%).
Аляксандр Карлюкевіч раскрыў асноўныя напрамкі дзяржаўнай маладзевай палітыкі, адзначыў, што ў краіне рэалізуецца комплекс мер, скіраваных на падтрымку маладых грамадзян, рэалізацыю іх патэнцыялу ва ўсіх галінах народнай гаспадаркі. Так, для падтрымкі адоранай і таленавітай моладзі выплочваецца 200 стыпендый Прэзідэнта Рэспублікі Беларусь студэнтам і курсантам і яшчэ 100 стыпендый маладым вучоным. У 2017 годзе за поспехі ў вучобе і навукова-даследчай дзейнасці за кошт сродкаў Спецыяльнага фонда Прэзідэнта было заахвочана 2 070 чалавек. Вялікая ўвага надаецца адукацыі і забеспячэнню занятасці моладзі, яе актыўнаму ўдзелу ў стварэнні эканомікі ведаў.
Міністр падкрэсліў, наколькі важна захоўваць пераемнасць пакаленняў, клапаціцца пра падрыхтоўку надзейнага кадравага рэзерву. Па зменах ва ўрадзе бачна, што сёння мае месца істотнае амаладжэнне кадраў. Трэба, каб і на кожным прадпрыемстве, сказаў Аляксандр Мікалаевіч, за спінай вопытных спецыялістаў стаялі маладыя, творчыя, ініцыятыўныя працаўнікі – толькі так можна спадзявацца на добрыя перспектывы ў развіцці.
Далей кіраўнік ведамства праінфармаваў удзельнікаў сустрэчы пра змены, што будуць унесены ў заканадаўства аб сродках масавай інфармацыі. Новаўвядзенні ўжо зацверджаны верхняй і ніжняй палатамі парламента і ўступяць у дзеянне з 1 снежня. У прыватнасці, будзе праводзіцца ідэнтыфікацыя аўтараў, якія ананімна выкладваюць свае каментарыі на інтэрнэт-парталах, даючы ацэнку тым ці іншым паведамленням. Яны, па словах міністра, могуць працягваць друкавацца пад псеўданімамі, але ўладальнік рэсурсу павінен ведаць, хто стаіць за невядомым прозвішчам, і падзяляць адказнасць за змест каментарыя. Галоўнай умовай запатрабаванасці СМІ Аляксандр Карлюкевіч назваў іх здольнасць працаваць у той праблемна-тэматычнай прасторы, якая цікавіць чытачоў.
Нягледзячы на імклівае распаўсюджванне інтэрнэту, адзначыў міністр, цікавасць жыхароў краіны да друкаванай кнігі застаецца вялікай. Штогод у Беларусі выпускаецца 10-12 тысяч кніжніх выданняў. У сістэме «Белкнігі», якая аб’ядноўвае больш за сто магазінаў, штогод адкрываецца 5-6 новых гандлёвых кропак. У адной толькі сталічнай кнігарні «Светач» сутачная выкладка кніг складае каля 70 тысяч найменняў. З кітайскімі партнёрамі заключана пагадненне на рэалізацыю інвестыцыйнага праекта, згодна з якім у беларускіх кнігарнях з’явяцца паліцы з выданнямі з Кітая.
Напрыканцы Аляксандр Карлюкевіч адказаў на пытанні супрацоўнікаў друкарні, а затым правёў рабочую сустрэчу з дырэктарам КУПП «Спадчына Ф. Скарыны» Мікалаем Ільюшонкам. Па словах кіраўніка, сёння прадпрыемства ўстойліва развіваецца, ажыццяўляе шырокі спектр паслуг і асвойвае новыя віды прадукцыі. За мінулы год колькасць заказчыкаў тут перавысіла 7,5 тыс., сярод іх усе буйныя прадпрыемствы малочнай перапрацоўкі Віцебшчыны. У бліжэйшы час па праграме мадэрнізацыі друкарня плануе закупіць яшчэ адну сучасную машыну для вытворчасці ўпакоўкі метадам флексаграфіі.
Фота Ларысы МАЛАШЭНI
