Нацыянальны парк «Браслаўскія азёры» правёў веснавое зарыбленне шэрагу вадаёмаў, якія перададзены яму ў карыстанне. У прыватнасці, амаль паўтара мільёна малькоў шчупака пад наглядам дзвюх інспекцый – міжраённай па ахове жывёльнага і расліннага свету і прыродных рэсурсаў і аховы навакольнага асяроддзя, – а таксама прадстаўнікоў Міністэрства сельскай гаспадаркі выпушчаны ў азёры Войса, Недрава, Абаб’е, Богінскае, Загорнае, Астравіта, Плуцянок.
Як расказвае малодшы навуковы супрацоўнік нацпарку Яўген Кардэль, практычна ўвесь пасадачны матэрыял, у чатыры разы большы па колькасці ў параўнанні з мінулагоднім, вырашчаны ўласнымі сіламі. Гэта стала магчымым пасля рэканструкцыі гадавальніка «Мякяны», у выніку якой істотна павялічаны плошчы нераставых сажалак.
Яшчэ 285 тысяч малькоў шчупака нацпарк закупіў у ААТ «Рыбгас «Волма» і «Тэрра Фіш». Імі зарыбілі возера Дрывяты.
Але, сцвярджае Яўген Кардэль, план выкананы не ў поўным аб’ёме з-за неспрыяльнага надвор’я. Таму работа будзе працягвацца. У планах — далейшае зарыбленне азёр Дрывяты і Войса, іншых вадаёмаў раёна.
Акрамя аматарскага рыбалоўства на азёрах, установа прапануе гарантаваную рыбалку на гадавальніку «Мякяны», дзе адна з сажалак багатая на адборнага карпа і белага амура. Неўзабаве будзе адкрыта яшчэ адна, у якую запусцілі 500 кг карпа і каля тоны сярэбранага карася і белага амура.