Міжнароднае свята традыцыйнай культуры «Браслаўскія зарніцы – 2023» стартавала сёння ў Браславе.
Падчас свята пройдуць шматлікія конкурсы, творчыя спаборніцтвы і паказы прафесійных і самадзейных артыстаў. На два дні горад стане вялікай пляцоўкай, дзе кожны знойдзе занятак па душы.
Фестываль адкрыўся персанальнай выставай ”Крылатыя фарбы Браслаўшчыны” ксяндза з Друі Сяргея Сурыновіча. Святар рознабакова таленавіты чалавек, піша вершы, карціны, праводзіць міжнародныя плэнеры мастакоў. “Зарніцы” далі магчымасць пазнаёміцца з яго новымі работамі шырокаму колу гледачоў.
Развіццё і папулярызацыя вакальна-харавога мастацтва было і застаецца нязменным накірункам фестывалю. З 2012 года неад’емнай часткай яго стаў абласны конкурс “Браслаўская харавая асамблея”. Сёлета ў ёй прымуць удзел больш за дваццаць дзіцячых і дарослых калектываў. Адзін за другім яны выходзілі на сцэну, прадстаўлялі розныя па жанру і характару музычныя творы, здзіўлялі слухачоў майстэрствам іх выканання.
Фота аўтара.
