«Чырвоны мост» прэзентавалі ў Віцебску

У Віцебскай абласной бібліятэцы сабраліся аматары беларускай літаратуры, каб сустрэцца з пісьменнікам, журналістам, заслужаным дзеячам культуры Рэспублікі Беларусь, нашым земляком Навумам Гальпяровічам. Галоўнай падзеяй  стала прэзентацыя яго стаўшага ўжо папулярным рамана-эсэ «Чырвоны мост».

Чырвоны мост – адно з самых знакавых мясцін старажытнага Полацка, сакральны вобраз дзяцінства і маладосці аўтара, яго першага кахання і вернай дружбы.

– Для мяне гэта месца, дзе мы сустракаліся з сябрамі. Гэта гістарычная пабудова служыць мастом паміж мінулым і сучаснасцю, - пачаў сустрэчу Навум Якаўлевіч. – З часам яшчэ больш адчуваеш любоў да сваіх бацькоў, родных, людзей, перад кім я ў даўгу. Гэту повязь я спраўджваю сваёй творчасцю.

Дарэчы, кніга «Чырвоны мост» атрымала надзвычайна вялікі попыт, за лічаныя дні тыраж разышоўся праз кнігарні. Сакрэт поспеху – у шчырым кранальным аповедзе аўтара.

Асобную ўвагу падчас сустрэчы Навум Гальпяровіч звярнуў на тэму захавання сямейных каштоўнасцяў:

– У Год беларускай жанчыны заўсёды ў праграме «Суразмоўцы» (ідзе на тэлеканале «Беларусь 3»)  пытаюся пра жаночае шчасце. І заўсёды чую ў адказ – гэта сям'я. Сапраўды, няма больш вышэйшага, чым любоў бацька і сына, маці і дачкі...

У сустрэчы ўдзельнічалі і іншыя аўтарытэтныя і вядомыя госці з Мінска –  Ігар Капылоў – дырэктар Інстытута мовазнаўства імя Якуба Коласа НАН Беларусі, кандыдат філалагічных навук, дацэнт, Анатоль Гармаза – мастак, генеральны дырэктар ТАА «Рэдакцыя газеты "Шапокляк".

Ігар Капылоў падзяліўся сваімі ўражаннямі:

– Калі прачытаў кнігу «Чырвоны мост» – быццам пазнаў сябе, падобнае было і ў маім жыцці, светаўспрыманні. Мы розныя ў нечым, але мы адзіны народ. Я раю ўсім прачытаць гэту кнігу, бо ў ёй сапраўдная любоў да Радзімы.

Сярод тых, хто прыйшоў на творчую сустрэчу з літаратарам – віцебскі мастак Міхась Ляўковіч. На памяць ён падарыў Навуму Гальпяровічу пейзаж родных для абодвух полацкіх мясцін. Гэты жэст стаў сімвалічным знакам павагі і цеплыні.

Асабліва кранальным момантам стала тое, што на прэзентацыю прыехалі з Полацку родная сястра паэта, блізкія, а таксама супрацоўнікі бібліятэкі.  

Навум Гальпяровіч прызнаўся, што зараз працуе над працягам – другой часткай, якую назаве  «Мой Іерусалім», дзе разважае пра тое, што аб’ядноўвае людзей.

Ульяна ВЫДРОВА, студэнтка ВДУ ім. П. Машэрава, фота Ульяна ВЫДРОВА.