Памяць свайго знакамітага земляка, беларускага асветніка і гуманіста Васіля Цяпінскага, ушанавалі ў Чашніках чацвёртым раённым фестывалем у яго гонар.
Сам Васіль Цяпінскі, вобраз якога ўдала ўвасобіў Ілля Міхайлаў, узначальваў тэатралізаванае шэсце. Яго выявы ўпрыгожвалі майкі многіх жыхароў раёна, яму і дарагому сэрцу куточку Айчыны прысвячалі творчыя здабыткі.
- Васіль Цяпінскі - адзін з тых, дзякуючы каму ў нас ёсць магчымасць чытаць па-беларуску, - віншуючы землякоў, адзначыў старшыня райвыканкама Аляксандр Быкаў. - Памяць аб ім прайшла праз стагоддзі, і сёння робіцца многае, каб нашчадкі ведалі сваю гісторыю і ганарыліся людзьмі, якія прысвяцілі жыццё росквіту роднай зямлі.
Упершыню ў раёне арганізавалі конкурс самаробнай кнігі - і годных узораў было багата. Таксама ўпершыню чашнічан чакала сустрэча з удзельнікамі народнага аматарскага аб’яднання “Млын” з Навалукомля.
На святочных падворках сельскіх саветаў было і весела, і смачна - беларусы ж умеюць сустракаць гасцей. Не адставалі ад сельсаветаў прадпрыемствы, арганізацыі, установы культуры - таксама аформілі свае пляцоўкі і стваралі гасцям добры настрой. Асабліва актыўнымі ў шэсці, канцэртнай праграме, ва ўсіх куточках фестывалю былі дзеці. Прыгожыя, разумныя, дасціпныя і вольныя нашчадкі - як раз такія, якімі хацеў бачыць іх Васіль Цяпінскі.
Асабліва актыўнымі ў шэсці, канцэртнай праграме, ва ўсіх куточках фестывалю былі дзеці. Прыгожыя, разумныя, дасціпныя і вольныя нашчадкі - як раз такія, якімі хацеў бачыць іх Васіль Цяпінскі.
Фота аўтара.
