Жніво не застаецца па-за ўвагай самадзейных артыстаў Віцебшчыны, якія ад пачатку і да заканчэння ўборачнай кампаніі рэгулярна выязджаюць на палі, каб у абедзены перапынак падарыць хлебаробам добры настрой.
У іх ліку народныя ансамблі “Вечарынка” і “Вясёлыя музыкі”, а таксама клуб аматараў фальклору “Крывія” Сенненскага раённага цэнтра культуры і народнай творчасці.
Першым двум калектывам больш за дваццаць гадоў. У іх склад уваходзяць работнікі культуры, медыкі, педагогі. Напрыклад, “Вечарынка” ўдзельнічала ў праекце Белтэлерадыёкампаніі “Наперад у мінулае”, які прысвечаны спрадвечнай песеннай культуры нашай зямлі.
А “Вясёлыя музыкі” для многіх жыхароў Сенненшчыны сталі добрымі знаёмымі, бо іх часта запрашаюць на розныя сямейныя ўрачыстасці.
“Крывіі” крыху больш за год, але калектыў, як гаворыцца, набірае абароты. Яго мастацкі кіраўнік Дзмітрый Зайко цікавіцца рэгіянальнымі скокамі. “Крывія” адрадзіла аўтэнтычны танец “Ходцаўская кадрыля”, які зараз прэтэндуе на ўключэнне ў Дзяржаўны спіс нематэрыяльных гісторыка-культурных каштоўнасцяў Рэспублікі Беларусь. Калектыў сёлета выступаў на турніры нацыянальных танцаў, што адбываўся падчас “Славянскага базару” на плошчы Свабоды, і даваў майстар-клас на “Троіцкім фестывалі”, які трэці раз прымала Астроўна Бешанковіцкага раёна.
Фота Сяргей Ляшук.
