Пленэр графікі «Полацк у гравюрах сучасных мастакоў» праходзіць у старажытным горадзе з 24 жніўня па 2 верасня.
Гравюры Скарыны з выдання “Скарынаўскі каляндар”
У Полацк прыехалі беларускія майстры графікі Андрэй Басалыга, Уладзімір Савіч, Вольга Нікішына, Павел Амялюсік, а таксама мастакі з Літвы. На працягу 10 дзён яны наведваюць адметныя месцы горада, а затым прэзентуюць грамадскасці графічныя працы, выкананыя ў тэхніцы літаграфіі, афорта, лінагравюры.
Адначасова ў Мастацкай галерэі Нацыянальнага Полацкага гісторыка-культурнага музея-запаведніка можна пабачыць выставу графікі сучасных беларускіх мастакоў, дзе экспануецца 111 прац 17 аўтараў.
Абедзьве падзеі, як адзначыла загадчыца Мастацкай галерэі Ларыса Лысенка, прысвечаны 500-годдзю беларускага кнігадрукавання і невыпадкова адбываюцца на радзіме знакамітага палачаніна Францыска Скарыны. Гісторыя беларускай гравюры бярэ пачатак з часоў выдавецкай дзейнасці славутага асветніка, усе яго кнігі суправаджаюцца ілюстрацыямі, выкананымі на высокім мастацкім узроўні.
Традыцыі земляка годна працягваюць і сучасныя мастакі. Беларуская графіка сёння карыстаецца сусветнай папулярнасцю. Пазнаёміцца з яе лепшымі ўзорамі змогуць і ўдзельнікі святкавання Дня беларускага пісьменства.
Фота Ларысы МАЛАШЭНI
