Шаркаўшчынскім хлебаробам на дапамогу з Гродзенскай вобласці прыйшоў зводны механізаваны атрад з адзінаццаці зернеўборачных камбайнаў і чатырох грузавых аўтамашын.
Як паведаміў першы намеснік старшыні райвыканкама, начальнік упраўлення па сельскай гаспадарцы і харчаванні Аляксандр Варона, тэхніка будзе задзейнічана ва ўборцы зерневых культур у чатырох гаспадарках раёна.
Магутныя зернеўборачныя камбайны «Палессе КЗС-1218» калонай, арганізаванай у горадзе Астравец, што на Гродзеншчыне, прайшлі 10-гадзінны шлях праз Пастаўскі і Браслаўскі раёны, каб трапіць на дапамогу шаркаўчанам. У мехатрадзе, як мы даведаліся ў гутарцы з механізатарамі, тэхніка са Смаргонскага і Іўеўскага раёнаў.
— Я працую на Смагорншчыне. Кіраўніцтва нашага сельгаспрадпрыемства камандзіравала на Віцебшчыну, каб дапамагчы мясцовым аграрыям ва ўборцы зерневых культур, – гаворыць камбайнер Уладзімір Урбановіч.– Буду прыкладаць намаганні, каб абмалаціць як мага больш гектараў, галоўнае цяпер – надвор’е.
— У тры гадзіны ночы выехаў з Іўя, адзначае камбайнер Віктар Ярошка. – У Гальшанах, Смаргоні, Астраўцы да нас далучыліся іншыя камбайны. У такую дальнюю камандзіроўку трапіў упершыню. Жытнёвыя палеткі ў сваёй гаспадарцы мы абмалацілі, цяпер з вялікай ахвотай будзем дапамагаць шаркаўшчынскім вясковым працаўнікам.
Як толькі спадзе раса на жніўных палетках, 11 камбайнаў прыступяць да абмалоту зерневых культур. Два экіпажы гродзенскіх хлебаробаў будуць працаваць у ААТ «Даватарскі», такая ж колькасць – на КУВСП імя Маркава, тры акажуць дапамогу аграрыям ААТ «Буеўшчына», чатыры – ААТ «Жвіранка».
Па стане на 21 жніўня, зерневыя і зернебабовыя культуры ў Шаркаўшчынскім раёне убраны на плошчы 5888 гектараў, што складае 40 % ад задання. Відавочна, што дапамога гродзенцаў на жніве вельмі дарэчы.
Сяргей РАЙЧОНАК, фота аўтара.
