Моладзь краіны распачынае мерапрыемствы Дня беларускага пісьменства ў Полацку. Ужо заўтра тут пройдзе Скарынаўская алімпіяда, што збярэ юных інтэлектуалаў з розных куткоў Беларусі.
У чым значнасць спраў Францыска Скарыны, якія запаветы ён нам пакінуў і чаму дзейнасць вялікага першадрукара для многіх пакаленняў беларусаў з’яўляецца прыкладам самаадданага служэння Айчыне? На гэтыя і іншыя пытанні паспрабуюць знайсці адказы ўдзельнікі падчас конкурсных выпрабаванняў.
Пад эгідай каардынацыйнага савета моладзевых парламентаў Беларусі ў Полацку пройдзе рэспубліканскі форум «Нам жыць і працаваць на роднай зямлі».
На свяце таксама адбудзецца прэзентацыя вынікаў унікальнага краязнаўчага праекта «Полацк вачыма дзяцей, або Горад у мініяцюры». На працягу некалькіх месяцаў навучэнцы і педагогі 26 устаноў адукацыі вывучалі знакавыя помнікі Полаччыны і стваралі іх макеты ў розных тэхніках у маштабе 1:30. Падчас Дня беларускага пісьменства школьнікі не толькі прадэманструюць свае працы, але і правядуць для гасцей пазнавальныя экскурсіі.
– Імя Скарыны ў будучыню панясе моладзь, таму нам вельмі важна, каб яна ведала гісторыю сваёй Радзімы, – адзначыла галоўны спецыяліст аддзела адукацыі, спорту і турызму Аксана Грыб.
Праграма Дня беларускага пісьменства ў Полацку>>
