Году малой радзімы прысвячаецца XXV Дзень беларускага пісьменства, які пройдзе 2 верасня ў горадзе Іванава Брэсцкай вобласці.
Да 1940 года ён зваўся Янавам. Тут у далёкім 1657-м пачаўся шлях у бяссмерце Андрэя Баболі, святога пакутніка, касцёл у гонар якога збудаваны ў Полацку.
Вёска Варацэвічы сённяшняга Іванаўскага раёна – малая радзіма беларускага, літоўскага і польскага літаратара, музыкі, кампазітара, скульптара і педагога Напалеона Орды (1807 – 1883), хрышчанага ў Янаўскім касцёле. Гэты шматгранна адораны чалавек быў удзельнікам Польскага гістарычна-літаратурнага таварыства, перакладаў творы ўраджэнцаў беларускіх зямель на французскую мову. Апублікаваў першы падручнік польскай мовы для замежнікаў. Ім напісана шмат музычных твораў, дапаможнік па тэорыі музыкі «Граматыка музыкі». Напален Орда – аўтар 200 замалёвак славутых мясцін Беларусі. Дзякуючы яму зараз вядома, як выглядалі, напрыклад, у XIX ст.
Рынкавая плошча ў Віцебску, Сафійскі сабор і Спаса-Ефрасіннеўская царква ў Полацку, Асвея і Юстыянава Верхнядзвінскага раёна, Бешанковічы, іншыя населеныя пункты Віцебшчыны і іх архітэктурныя славутасці. Магіла Напалеона Орды ў Іванаве не захавалася. Тут яму ўстаноўлены адзіны ў Еўропе помнік.
З гэтых мясцін пачаўся род класіка рускай літаратуры Фёдара Дастаеўскага (1821 – 1881). У Дастоеўскай сярэдняй школе, якая носіць імя славутага пісьменніка, дзейнічае літаратурна-краязнаўчы музей.
Адсюль паходзіць паэт Мікола Федзюковіч, тут распачынаў сваю творчую дзейнасць празаік Анатоль Крэйдзіч і зараз працуе шэраг літаратараў.
Праз Іванава праходзіць турыстычны маршрут «Россып талентаў палескіх». Мясцовыя адметнасці: царква Пакрова Прасвятой Багародзіцы, касцёл Узвышэння Святога Крыжа, музей гісторыі ўтварэння раёна, адзіная ў Беларусі школа бондарства, створаная ў 2011 годзе і адзначаная прэміяй «За духоўнае адраджэнне» (зараз школа мастацтваў), іншыя цікавыя аб’екты.
Гэтым разам на Дзень пісьменства пройдзе круглы стол беларускіх і замежных майстроў пяра «Мастацкая літаратура як шлях адзін да аднаго», ушанаванне лепшых айчынных аўтараў па тэме радзімазнаўства, шэраг краязнаўчых і асветніцкіх мерапрыемстваў. У свяце плануецца ўдзел дэлегацыі Віцебскага абласнога аддзялення Саюза пісьменнікаў Беларусі.
