З аншлагам прайшла імпрэза, прысвечаная Дню роднай мовы ў Беларускім тэатры “Лялька”. Першую частку мерапрыемства склалі вершы, песні і проза выдатнай віцебскай паэтэсы, пісьменніцы, літаратуразнаўцы, кандыдата філалагічных навук Вольгі Русілкі. Назва літаратурна-тэатральнай вечарыны “Да мяне прытулілася Слова” ўзята з яе лірычнага верша.
Вольга Іванаўна распавяла пра сваю малую радзіму– вёску Бершты Шчучынскага раёна Гродзенскай вобласці і прэзентавала сваю новую кнігу “Котра”. Шчыра прызналася ў любові да тэатра, дзе жыве цудоўнае беларускае слова.
Беларуская мова будзе жыць у стагоддзях, – выказала ўпэўненасць пісьменніца. – Бо яна прайшла праз неверагодныя выпрабаванні і зараз стала мовай зносін беларускай інтэлегенцыі, моладзі, інтэлектуалаў, якія любяць сваю Айчыну і ганарацца яе спадчынай.
Артысты тэатра “Лялька” натхнёна прадставілі літаратурныя пярліны Вольгі Русілкі, якія склаліся ў суцэльныя каралі яе яскравай і сакавітай творчасці.
Пасля сустрэчы з цікавым аўтарам гледачам была прадстаўлена казка–прыпавесць Уладзіміра Караткевіча “Кацёл з каменчыкамі” ў пастаноўцы Марыі Кавалёвай.
Святлана Дзядзінкіна, фота Вячаслава Шайнурова.
