Дзяўчаты Віцебскай абласной клінічнай інфекцыйнай бальніцы адсвяткавалі традыцыйнае беларускае свята Купалле, прымеркаванае да перыяду летняга сонцастаяння. Мерапрыемства, арганізаванае адміністрацыяй і прафсаюзным камітэтам бальніцы, было прасякнута атмасферай магіі, яднання з прыродай і старажытнымі традыцыямі.
Для ўдзельніц падрыхтавалі насычаную праграму. Яна ўключала выязны майстар-клас па пляценні вяночкаў з палявых кветак, што дазволіла акунуцца ў старажытны абрад, які сімвалізуе маладосць і надзею. Адмыслова быў распрацаваны займальны Купальскі квэст, падчас якога ўдзельніцы праверылі свае веды аб лекавых травах Беларусі і пазнаёміліся з іх уласцівасцямі.
Удзельнікі свята пазнаёміліся з багатай гісторыяй Купалля, яго абрадамі і вераваннямі. Самыя ўважлівыя, збіраючы па кавалачках карту, змаглі знайсці міфічную Папараць-кветку, што прынесла нямала радасці і весялосці.
– Купалле – гэта не проста свята, гэта наш генетычны код, сувязь з продкамі і магчымасць адчуць прыгажосць роднай зямлі. Гэтыя традыцыі вучаць нас шанаваць прыроду, адзінства і нагадваюць, што мы існуем, пакуль памятаем свае карані, – адзначыла старшыня прафсаюзнага камітэта бальніцы Наталля Варанцова. – Такія мерапрыемствы не толькі аб'ядноўваюць калектыў, але і даюць магчымасць адпачыць душой, набрацца сіл і захаваць наша культурнае багацце.
Купалле – найстаражытнае свята, якое адзначалі ў перыяд летняга сонцастаяння, калі росквіт прыроды дасягае найвышэйшай кропкі. У падзяку за падарункі жыцця, як раз перад жнівом, людзі святкавалі яднанне з прыродай, варажылі і загадвалі жаданні аб лепшай долі. Гэтае мерапрыемства стала яркім пацверджаннем таго, што памяць аб сваіх каранях жыве і перадаецца з пакалення ў пакаленне.
Перададзена абласной арганізацыяй Беларускага прафсаюза работнікаў аховы здароўя.
