У адзін з выхадных дзён жыхары Міёр маглі назіраць на прыгарадным возеры рэдкую для марознага (слупок тэрмометра апускаўся ніжэй 20 градусаў) дня карціну: групкамі і паасобку на вадаёме сядзеў не адзін дзясятак рыбаловаў.

Самыя цікаўныя гараджане хутка навялі даведкі. Аказалася, што раённая арганізацыя Беларускага таварыства паляўнічых і рыбаловаў праводзіць спаборніцтвы па падлёднай лоўлі рыбы.

Кожны, хто выйшаў на лёд, спадзяваўся на перамогу, а разам з ёй і на прыз, які абяцалі таварыства і гаспадыня магазіна рыбалоўных прылад «У рыбачкі» Іна Гяч.

Лоўля на мармышку аказалася самай папулярнай, ёй выказалі жаданне заняцца 15 дарослых рыбаловаў і шэсць юніёраў. З жэрліцамі прыйшлі толькі 9 чалавек.

Задаволіцца рыбалкай удзельнікі спаборніцтваў наў­рад змаглі – на пошук «рыбацкага шчасця» былі адведзены толькі тры гадзіны. Але некаторыя за гэты час здабылі ад кілаграма да двух акунёў ды шчупакоў. У якасці прызоў шчасліўцы атрымалі лёдабур, рыбалоўную скрынку і складное крэсла, набор жэрліц, вядз­ерца для жыўцоў. Юніёрам уручылі білеты рыбаловаў-аматараў.

 Заключным акордам спаборніцтваў стала частаванне гарачымі чаем і юшкай.

Фота з адкрытых крыніц.