Важная падзея для развіцця краязнаўства Віцебскага раёна адбылася ў межах цыкла «Краязнаўчыя сустрэчы». У абласной бібліятэцы імя У.І. Леніна была прэзентавана кніга «Краязнаўчы атлас Віцебскага раёна».

Кандыдат гістарычных навук, дацэнт Мікалай Півавар падрыхтаваў унікальнае выданне – своеасаблівы даведнік з інфармацыяй пра аб’екты прыроднага, эканамічнага, канфесійнага жыцця, гісторыка-культурную спадчыну рэгіёна, матэрыяльныя і духоўныя каштоўнасці краю.

Аўтар адзначыў, што матэрыял для кнігі ён пачаў збіраць яшчэ падчас першых экскурсій, але сур’ёзная праца была наладжана ў 2014 годзе,у 2024 годзе быў выдадзены «Краязнаўчы атлас Віцебскага раёна». Вялікую карысць выдання Мікалай Півавар бачыць у ілюстрацыях – амаль 1000 фотаздымкаў. Такім чынам, кніга не проста расказвае пра гісторыю нашага краю, а набывае вялікую карысць для экалагічнага, прамысловага, гастранамічнага, рамесніцкага, аздараўленчага, пазнавальнага і іншых відаў турызму.

Мікалай Півавар расказаў зацікаўленым пра асаблівасці краязнаўчых помнікаў і ландшафтнага турызму. Акрамя таго, аўтар кнігі падзяліўся ідэямі для далейшага даследавання ў галіне краязнаўства Віцебскага раёна.

Прэзентацыя кнігі была арыентавана на атрыманне зваротнай сувязі, бо ўсе зацікаўленыя могуць дапамагчы ў зборы інфармацыі для новых выданняў і адкрыцці Віцебшчыны.

Караліна Велічка, фота Марцінкевіча Міхаіла.