Ніводнага дня свайго жыцця без трактара не ўяўляе Алег Рабіза. Ужо амаль сорак год мужчына працуе механізатарам у аддзяленні Вялікае Сяло ААТ «Шаркаўшчынскі агратэхсэрвіс».
Алег на сваім «сталёвым кані» з лёгкасцю спраўляецца з любой даручанай справай: сее, глебу ўзворвае, перавозіць грузы.
– За рулём трактара з 1986 года, адразу пасля заканчэння школы, – кажа механізатар. – Пачынаў працаваць у калгасе «Вялікае Сяло», цяпер гэта аб’яднанае сельгаспрадпрыемства «Шаркаўшчынскі агратэхсэрвіс». Мяняюцца назвы гаспадарак, адбываецца іх узбуйненне, удасканальваецца і тэхніка, на якой мы працуем. Нязменнай застаецца толькі наша адданасць роднай зямлі, працы на ёй.
– Алег Рабіза – адзін з самых вопытных работнікаў нашага сельгаспрадпрыемства, – кажа дырэктар Міхаіл Кавалёнак. – Ён беражліва адносіцца да тэхнікі, любую даручаную справу выконвае якасна і ў тэрмін.
За гады шчырай і бездакорнай працы механізатар неаднаразова ўзнагароджваўся на раённым і абласным узроўнях. Калі ў пачатку 2011 года ў Віцебску ўпершыню праходзіла ўрачыстая цырымонія ўшанавання лаўрэатаў ганаровага звання «Чалавек года Віцебшчыны» па выніках работы за 2010 год, Алег Рабіза быў сярод узнагароджаных у намінацыі «Аграпрамысловы комплекс».
Два гады назад гаспадарка набыла новы трактар «Беларус» МТЗ-1221. Кіраўніцтва не вагалася ў пытанні, каму з механізатараў даручыць тэхніку. Аднагалосна вырашылі – на Смаргонскі агрэгатны завод будзе камандзіраваны Алег Рабіза.
– Айчынная тэхніка – выдатная, вузлы і агрэгаты цалкам мне знаёмыя, таму і працую на сваім «Беларусе» як шчыры беларус дзеля дабрабыту сям’і і дзяржавы.
Фота Сяргей РАЙЧОНАК
