Умацаваць давер, развіць узаемадзеянне. Гэтыя словы старшыні Віцебскага аблвыканкама Мікалая Шарснёва і Дзяржаўнага сакратара Міністэрства замежных спраў Латвійскай Рэспублікі Андрэя Пілдзеговіча, сказаныя журналістам беларускіх СМІ падчас азнаямляльнага візіту ў Беларусь кіраўнікоў дыпламатычных місій, акрэдытаваных у Латвіі, бадай, найбольш поўна характарызавалі сутнасць сустрэчы, якая адбылася 25 верасня ў Браславе. Менавіта замежныя дыпламаты выказалі жаданне пазнаёміцца з паўсядзённай работай пункта пропуску латвійска-беларускага пагранічнага пераходу «Сілене – Урбаны», абмеркаваць праблемы рэгіянальнага супрацоўніцтва з кіраўніцтвам памежнага Браслаўскага раёна і ўсёй Віцебскай вобласці. Іх таксама цікавілі найбольш прывабныя турыстычныя аб’екты рэгіёна, гісторыка-культурная спадчына Віцебшчыны. Беларускі бок быў гатовы прыняць гасцей і расказаць ім пра наша жыццё. Бо, як адзначыў Мікалай Шарснёў, гарантыя поспеху любога праекта – людзі. Ад іх асабістых уражанняў вельмі часта залежыць многае ў развіцці супрацоўніцтва ў самых розных накірунках. А геаграфічнае знаходжанне Браслаўшчыны дае шырокія магчымасці для развіцця міжнароднага ўзаемадзеяння. Ужо сёння, падкрэсліваў падчас сустрэчы з замежнымі гасцямі старшыня райвыканкама Уладзімір Дранеўскі, яна мае 16 дагавораў аб супрацоўніцтве і 3 пратаколы аб намерах з рэгіёнамі Латвіі, Літвы, Украіны, Расіі, Польшчы, Эстоніі і Арменіі, з’яўляецца каардынуючым цэнтрам Еўрарэгіёна «Азёрны край», які ўключае 33 памежныя адміністрацыйныя тэрыторыі суседніх краін. Адсюль адгружаецца на экспарт чвэрць прадукцыі, што выпускаецца на прадпрыемствах Браслаўскага раёна.