«Ратуша на Духавай гары». Пад такім загалоўкам 19 ліпеня 1990 года ў газеце «Віцебскі рабочы» выйшаў артыкул, у якім расказвалася пра ўзвядзенне вежы (1) побач з новай прыбудовай да аблвыканкама. У той час гараджане спрачаліся, ці варта гэта рабіць. Можа, лепш аднавіць царкву Святога Духа (2)? Царква Святога Духа пабудавана каля сярэдзіны ХІV ст. (па некаторых звестках, у 1340 годзе) падчас кіраўніцтва віцебскага князя Альгерда (з 1345-га – вялікі князь ВКЛ). Пазней храм некалькі разоў пераходзіў ад праваслаўных да ўніятаў і наадварот. У 1697 годзе пры царкве заснаваны базыльянскі манастыр. На сродкі мешчаніна Патапа Бібкі царква перабудавана ў стылі віленскага барока. У 1839-м храм і манастыр сталі праваслаўнымі. У 1870-м царква перабудавана ў псеўдарускім стылі.