У Шумілінскім гісторыка-краязнаўчым музеі праходзіць выстава жывапісу сябра вiцебскага народнага клуба мастакоў-аматараў «Контур» Вячаслава Дружкiна.
На выставе прадстаўлена больш за 20 работ розных гадоў. Ёсць карціна «Фарбы восені» – адна з першых, якую стварыў мастак пасля вяртання з Казахстана ў Беларусь. Вячаслаў Дружкін нарадзіўся ў Казахстане, але цесна звязаны з Шуміліншчынай. Яго маці ў свой час паехала падымаць цаліну, і кожнае лета хлопец з сястрой Надзеяй прыязжаў ў райцэнтр да сваякоў.
Падчас адкрыцця выставы сястра мастака Надзея Ціхоніна, якая спецыяльна прыехала з Астаны, расказала, якім быў Вячаслаў у дзяцінстве, аб яго захапленнi маляваць і бачыць адметнае ў звычайных краявідах.
Вячаслаў Дружкін скончыў машына-будаўнічы тэхнікум. Пасля арміі жыў у Малдове, дзе і ажаніўся. Пазней вучыўся на афарміцельскім факультэце Маскоўскага народнага ўніверсітэта і на мастацка-графічным факультэце Аркалыкскага педінстытута. «Усюды, дзе не жыў, зачароўваўся прыродай, – адзначыў Вячаслаў Дружкін. – За шчасце было пабыць у лесе ці на рэчцы, памарыць, гледзячы на бясконцыя хлебныя прасторы. Хацелася перадаць хараство прыроды на карціны».
Вячаслаў Дружкін прызнаўся, што калі жыў у Казахстане, яму ў мясцовай прыродзе не хапала рознакаляровых фарбаў. Усё памянялася, калі ў 1996-м годзе сям'я пераехала на малую радзіму. З'явіліся і сакавітыя фарбы, і чароўная прырода. Менавіта Шуміліншчына стала новым творчым этапам мастака.
Аляксандр ШЭДЗЬКО, Шуміліна, фота аўтара.
