Дзевяцікласніца СШ № 2 г. Докшыцы стала пераможцай рэспубліканскага конкурсу юных чытальнікаў “Жывая класіка”, фінал якога адбыўся напярэдадні Дня беларускага пісьменства ў студыі сталічнага тэлебачання, сообщает газета «Родныя вытоки».
Дарэчы, для Марыі гэта ўжо другое ўдалае выступленне ў творчым конкурсе. У 2019 годзе яна адзначалася вышэйшай узнагародай за выдатнае выкананне “Крывавай балады” Анатоля Грачанікава. На гэты раз разам з класным кіраўніком Аксанай Бадун падрыхтавалі верш Змітрака Астапенкі “Спаленая вёска”.
– Выбраць твор, які потым можна не проста прачытаць, а пражыць, лічу адной з самых галоўных умоў перамогі, – разважае Аксана Анатольеўна. – Вось і на гэты раз найбольш намаганняў было прыкладзена ў пошуках верша. Пасля вялікай колькасці прачытаных спыніліся на “Спаленай вёсцы”. Сама Марыя – вясковая дзяўчынка, з Несцераўшчыны. З першага класа вучылася ў Тумілавіцкай школе. Магчыма, таму чытаць пра вёсачку, яе трагедыю атрымалася вельмі пранікнёна. Цікава, што колькі б ні чытала Марыя гэты твор – а з ім яна выступала спачатку на раённым этапе, а потым абласным – кожны раз выходзіць па-новаму. Сёлета па ўмовах конкурсу трэба было яшчэ запісаць відэаролік, здымкі якога прайшлі на мемарыяльным комплексе “Шунеўка”. Гэта, думаю, таксама ўнесла адпаведныя душэўныя эмоцыі ў твор Змітрака Астапенкі. Увогуле, Марыя Наско – наша школьная актывістка, творчая, здольная, таленавітая.
– Кожны раз, калі чытала гэты верш, думала пра сваю родную вёсачку Несцераўшчыну, якую таксама палілі ворагі ў гады Вялікай Айчыннай вайны, – гаворыць Марыя. – Лёс, напэўна,кожнай сям’і звязаны з трагічнымі падзеямі той вайны. Мае прадзядулі Іван Наско і Данііл Падбярэзскі былі партызанскімі сувязнымі. Прабабуля Сафія Шуневіч – вязнем канцлагера. Думкі пра іх таксама дапамагалі больш эмацыянальна “пражыць” верш.
У гэтым годзе ў конкурсе, прысвечаным Году гістарычнай памяці, удзельнічала каля 15 тысяч школьнікаў з усіх рэгіёнаў краіны, а фіналістамі сталі толькі 15.
Тэлеверсію фіналу конкурсу “Жывая класіка” можна будзе паглядзець на тэлеканале СТБ 4 верасня, у 16.55.
Фото dokshitsy.by
