Без перабольшання можна сказаць, што ў свае 9 год Дзіяна Пушнякова з Шуміліна – ужо сапраўдны віртуоз ігры на цымбалах. Летась яна стала лаўрэатам першага міжнароднага конкурсу «Музычны вернісаж», які праходзіў у Чэлябінску. Талент дзяўчынкі заўважылі, і сёлета ёй была прысуджана прэмія Віцебскага абласнога выканаўчага камітэта па падтрымцы таленавітай творчай моладзі.

А не так даўно Дзіяна Пушнякова стала пераможцам XXIV стаўбцоўскага адкрытага абласнога свята-конкурсу юных музыкантаў «Сымон-музыка». Там жа яе ўзнагародзілі і граматай за прапаганду музычнага мастацтва. Наша юная зямлячка з лёгкасцю абышла канкурэнтаў з буйных гарадоў краіны, у тым ліку і сталічных. Журы конкурсу высока ацаніла работу настаўніка дзіцячай школы мастацтваў Алены Скорынавай і канцэртмайстра Ганны Красоўскай, якія вялі дзяўчынку да перамогі.
У рэпертуары Дзіяны ўжо 9 музычных твораў, з якімі яна паспяхова выступае перад іншымі дзецьмі. «Многія, – расказала Алена Ігараўна, – гледзячы на яе, таксама зацікавіліся цымбаламі».

Дзяўчынка надзвычай артыстычная, у яе выдатны слых, голас. За цымбаламі яна адчувае сябе ўпэўнена і ўжо валодае прыёмамі, якія некаторым прыходзіцца адпрацоўваць гадамі. Больш таго, Дзіяна паралельна вучыцца іграць на некалькіх інструментах, асвойвае азы харавых спеваў, выступае сольна. Можна і не гаварыць пра тое, што ў вучобе яна таксама імкнецца быць выдатніцай.

Наталля Чарнічэнка.