Работнікі Міёрскай лінейнай дарожнай дыстанцыі № 342 ДЭУ № 34 Браслава рыхтуюцца да зімы. Ідзе назапашванне пясчана-салянай сумесі, замена дарожных знакаў, устаноўка вешак для абазначэння краю дарожнага палатна. На лінейцы гатоўнасці стаяць пяць трактароў маркі «Беларус», адзін пагрузчык «Амкадор», чатыры грузавых аўтамабіля, адзін аўтагрэйдэр, бітумавоз і аўтамабіль са спецыяльным абсталяваннем для ямачнага рамонту дарожнага пакрыцця.
– Наша задача – падтрыманне дарожнай інфраструктуры ў належным стане, – кажа начальнік дыстанцыі Васіль Гербка. – У вясенне-летні час займаемся абкосам прыдарожных палос, фарбаваннем аўтобусных павільёнаў, нанясеннем разметкі, ямачным і цякучым рамонтам. Зімой працы значна больш. Трэба своечасова ачысціць дарожнае палатно ад снежных сумётаў, рассыпаць пясчана-саляную сумесь супраць галалёдзіцы.
Як вядома, паспяховасць дзейнасці любого калектыву залежыць ад яго зладжанасці. У гэтым плане ў міёрскай дарожнай арганізацыі, дзе працуе 21 чалавек, усё добра: усе работнікі адказныя, кожны з іх выконвае шматлікія віды работ.
У ліку перадавікоў Васіль Гербка адзначыў дыспетчара Віктара Радзюка, вадзіцеля Валерыя Стэфановіча. Сумленнымі адносінамі да працы вылучаюцца вадзіцель Аляксандр Лабунька, ветэран галіны, вадзіцель пагрузчыка «Амкадор» Мікалай Шамёнак.
У наступным годзе Міёры стануць гаспадарамі правядзення абласнога фестывалю-кірмашу працаўнікоў вёскі «Дажынкі». Гэта значыць, што мясцовыя дарожнікі на чале з кіраўніком арганізацыі прыкладуць максімум намаганняў, каб палепшыць стан транспартных артэрый раёна.
У гэтым годзе па Міёрскім раёне лінейнай дарожнай дыстанцыяй № 342 адрамантавана дарог агульнай працягласцю 16,2 кіламетра. Ямачны рамонт праведзены на плошчы 6731 квадратны метр.
ДАВЕДКА «ВВ». Міёрская ЛДД № 342 абслугоўвае дарогі рэспубліканскага значэння ў межах Міёрскага раёна. У іх ведамстве трасы Р-14 Полацк — Міёры — Браслаў і Р-18 Верхнядзвінск — Шаркаўшчына — Казяны. Усяго ў яе падпарадкаванні знаходзіцца 117 кіламетраў дарог.
Фота Сяргей РАЙЧОНАК
