У пяты раз у вёсцы Жылінскія на Пастаўшчыне прайшоў адкрыты чэмпіянат па касьбе, які сёлета атрымаў статус міжнароднага.

Тое, што папулярнасць спаборніцтваў, распачатых пастаўчанінам Пятром Каралём, набірае размах, пацвердзіла істотна ўзросшая колькасць яго ўдзельнікаў. Сёлета пасапернічаць у валоданні вясковым інструментам сабраліся 25 чалавек. Яшчэ пяць – у хуткаснай касьбе на дыстанцыі ў 400 метраў. Гэта былі мужчыны і жанчыны з розных рэгіёнаў Беларусі, з Урала, Якуціі, Украіны, Польшчы. Акрамя дэманстрацыі сілы і спрыту кожны з іх мае і больш глыбокую мэту – не даць народным традыцыям адыйсці ў нябыт глыбей вывучаць побыт сваіх продкаў.

На ўсходзе сонца пачалася рэгістрацыя ўдзельнікаў спаборніцтваў, а неўзабаве зазвінелі косы. Касцы ўмела клалі траву ў роўныя пракосы. Усіх абышоў пастаўчанін, дэбютант спаборніцтваў Іосіф Галяк. Крыху адстаў ад яго Рыгор Равенька з Бярозы, трэцім – Аляксандр Андалецкі з Шаркаўшчынскага раёна.

Сярод жанчын былі свае лідары. Трэцяе месца прысуджана палачанцы Наталлі Сабчук, другое – пастаўчанцы Алене Хмылко. Пераможцай стала мясцовая ўраджэнка Ванда Купран, якая скасіла больш за 13 сотак травы.

Пераможцы і прызёры чэмпіянату ўзнагароджаны дыпломамі, грашовымі прэміямі, каштоўнымі падарункамі.

Далей пастаўчане, як паведаміў Пётр Кароль, маюць намер удзельнічаць у спаборніцтвах на айчынных і замежных пляцоўках. Найбліжэйшыя адбудуцца ў Славакіі, таму мінулы чэмпіянат – свайго роду адборачны тур да яго.