У 2000 годзе беларускія навукоўцы і супрацоўнікі РУП «Белкосмааэрагеадэзія» абнародавалі разлікі, паводле якіх геаграфічны цэнтр Еўропы размешчаны ў Віцебскай вобласці, паблізу возера Шо Глыбоцкага раёна, умоўны пункт – на беразе возера Івесь у аднайменнай вёсцы. Для разлікаў выкарыстоўвалася адмыслова распрацаваная камп’ютарная праграма. Еўропу прынялі за адзінае цэлае, уключыўшы астраўныя землі. Гэтую прастору пакрылі інтэгральнай сеткай і па ёй вылічылі цэнтральны пункт.
У 2008-м сталі вядомыя паўторныя разлікі, паводле якіх цэнтр Еўропы знаходзіцца ў Полацку. 30 мая таго ж года там быў адкрыты адпаведны памятны знак з каардынатамі старажытнага горада – 55º30´ паўночнай шыраты і 28º48´ усходняй даўгаты.
Дзеля справядлівасці трэба адзначыць, што і іншыя краіны прэтэндуюць на наяўнасць у іх такога цэнтра. Сярод найбольш аргументаваных версій: у вёсцы Пурнушкес у 27,8 км на поўнач ад Вільнюса (Літва), у Сухаволі каля Беластока (Польшча), дзе таксама пастаўлены памятныя знакі, каля вёскі Дзелавое непадалёк ад Рахава Закарпацкай вобласці (Украіна), у вёсцы Крагуле каля Крэмніцы (Славакія).
Такім чынам, у Беларусі, а дакладней – на Віцебшчыне, вызначаны два цэнтры Еўропы. І там, і там ахвотна фатаграфуюцца турысты.
Мікалай Півавар, кандыдат гістарычных навук.
Фота з адкрытых крыніц.
