На дапамогу шаркаўшчынскім аграрыям ва ўборцы кукурузы прыйшло механізаванае звяно з Глыбоцкага райаграсэрвісу. Працуюць яны на палетках
КУВСП імя Маркава.
Як толькі завяршылася жніво, вяскоўцы, не марудзячы часу, прыступілі да сяўбы азімых культур – рапсу, ячменю, пшаніцы, трыцікале. Паралельна вядзецца ўборка кукурузы на корм жывёле.
На КУВСП імя Маркава ў мінулыя гады з задачай уборкі царыцы палёў спраўляліся ўласнымі сіламі, бо ў гаспадарцы маюцца ў наяўнасці два кормаўборачныя камбайны «Палессе» КВК-800 і «Ягуар-850». Але з-за недахопу механізатарскіх кадраў сёлета было вырашана звярнуцца за дапамогай у Глыбоцкі райаграсэрвіс.
– Суседзі накіравалі на сельгаспрадпрыемства дзве адзінкі камбайнаў КВК-800, тры грузавыя аўтамашыны МАЗ, адзін трактар «Беларус» МТЗ-1221 для адвозу зялёнай масы, – тлумачыць галоўны аграном гаспадаркі Наталля Мацкевіч. – Мясцовыя механізатары займаюцца падрыхтоўкай глебы і сяўбой азімых зерневых культур, таму з дапамогай механізаванага звяна з Глыбокага нам вельмі пашанцавала.
Сёлета кукуруза была пасеяна на плошчы 278 гектараў. Аб’ём крыху меншы, чым у мінулым годзе, але ўраджайнасць зялёнай масы больш сярэднераённага паказчыка. На некаторых участках яна перавышае адзнаку 200 цэнтнераў з гектара (раённы – 144 ц/га). Заклалі ў траншэі больш 3000 тон сіласу, маем таксама 283 тоны сена, 6052 тоны сенажу. На адну ўмоўную галаву жывёлы ў гаспадарцы нарыхтавана амаль 19 цэнтнераў кармавых адзінак, што таксама перавышае сярэднераённы паказчык. Паралельна займаемся падрыхтоўкай глебы і сяўбой азімых пшаніцы і ячменю, закладваем аснову будучага ўраджаю.
Сяргей РАЙЧОНАК
